ستكون أول شخصية نتحدث معها في هذه الفقرة هي شخصية مصور صحفي يسعى لأن يكون رحالة حول العالم.هدفي تسليط الضوء على الأشخاص الذين تخطوا صعوبات كثيرة حتى أصبحوا ماهم عليه والهدف الأول والأخير هو "التحفيز" وإثبات جملة "نحنا قادرين"
شخصيتنا لليوم إنسان كلل حلمه الإصرار، شخصية ثابتة ضد عواصف النقد السلبي.¤ عرفنا بنفسك؟
-الاسم: بشار ماهر الضاهر
- العمر: 21 /من مدينة حمص
- دراسة: طالب علوم سياحية
¤ماالذي تحلم به يا بشار؟
أنو الناس تأمن بأنو التصوير فن.
"حلمي الشخصي أنو الناس تحب صوري أكتر"
¤ كيف أمسكت الخيط الأول في طريق حلمك؟
كون بالشارع وشوف لقطات أو أوقات أو مشهد غروب أو شروق وشوف زوايا كتير حلوة وحرام تروح، والشي التاني جذبني كنت تابع فيديوهات كان إلا الدور إنو تمرن عيني وحب التصوير يلي موجود فيني ومن وقتا بلشت حس إنو عيني هيي الكاميرا، وين مارحت حس إني عم صور بعيني.
¤ لابد لكل إنسان لديه حلم في مجتمع فقير للأحلام أن يواجه صعوبات، فما الصعوبات التي واجهتك؟
المحبط الأول بالنسبة لي هوي تعليقات الناس على التصوير
"أي هيي كبسة زر حاج تعمل حالك مصور وأنك عم تتعب بالصور!"
"عطيني الكاميرا لطلع نتيجة أجمل"
¤ كيف كان تعاملك مع النقد السلبي وكيف حاولت الإستفادة منه؟
تعاملت مع هي الفئة من الناس المحبطين يلي حكولي "هي كبسة زر" بإني عطيتهم الكاميرا وخليتهم يصوروا، تقريبا 75% من الصور طلعت ( Out Focus )
¤ما هو الهدف من عملك هذا؟
1- الشهرة مافي حدا ما بحب يكون مشهور بالمكان يلي هوي فيه.
2-محبة الناس متل ما علمني بابا إنو محبة الناس كنز لا يفنى .
¤ إلى ماذا تسعى ؟
عم اسعى بالفترة الأخيرة لإنشاء محتوى على اليوتيوب بمجال دراستي السياحة ( كون رحالة ) اكتشف طبيعة بلدنا وجمال المناطق والمناخ يلي فيه.
اطلع صور بالأمكان المشهورة فيا بلدنا، بالأمكان الطبيعية يلي عنا صوّر، بساطة الناس بطيبة الشعب المعروفين فيها.
حلمي إني كون أنا صانع محتوى وأنا يلي بصور وأنا يلي عم منتج بقناتي وأنا يلي عم قدم المحتوى قدام الكاميرا .
¤من دعمك خلال مسيرتك ؟
أهلي بفتخر فيون دائما، هنن يلي صنعوا بشار إن كان بالتصوير أو بالحياة العملية بابا وماما وإخواتي يلي كانوا جنبي أكيد ومع بعض المقربين جداً هنن كانو الداعمين الأساسيين لي.
¤كيف وصلت إلى مكانك هذا ؟
ضليت تقريباً أربع سنوات أتعلم -وأكيد لهلأ بتعلم- بهدول الأربع سنوات وقعت كتير وغلطت كتير لتعلمت، كنت اتعلم لحالي عن طريق كورسات على الانترنت، وبهدول الأربع سنين رسبت بالبكالوريا بسبب التصوير وهاد شي كان حافز إلي إنو رسبت لكون أقوى بهاد المجال وعوض السنة ايلي راحت عليي، كفيت دراسة وتصوير ووقت نجحت بابا كان سند إلي بالنجاح الدراسي وساعدني بعدة تصوير وكمان كان سند إلي ببداية شغلي وضليت هيك لحتى طورت من حالي وطورت من شغلي لحد ما وصلت لهون.
بسموني ( السبع👑 ) لأنو دائما بساعد الناس لتوصل، لأنو وقت كنت بحاجة مساعدة ماكان إلا القليل جنبي فبساعد بتصوير الفعاليات الشبابية شو ماكانت، وحتى تصويري مو دائماً كرمال المقابل المادي أغلب تصويري اليوم هوي عم يكون دعم للفئات الشابة الصاعدة لتوصل لحلمها متل ما أنا اليوم قريب من حلمي.
رابط صفحة العمل:
https://m.facebook.com/Bashar-PhotoVideo-109832167183594/?ref=bookmarks
#شخصيات_عكس_التيار
#نحنا_قادرين
✏نور أنس طيارة
❤❤❤
ردحذفبلتوفيق ولنجاح
ردحذف